浸大師生登入 訪客登入
簡體 | 繁體 | ENG
 
@B
浸大職員

   
@B這個名字正好貼切地形容筆者與「浸會」的一段不解緣。

自幼@B的人生已巧妙地與「浸會」連繫上。小時在香港浸會醫院出世,十歲受浸於浸信會。其後,@B分別於浸信會呂明才中學和香港浸會大學完成中學及大學課程。自零五年大學畢業後,@B有感自己的足跡應遍佈「浸會」的每一個角落,因此她選擇回饋她的母校浸會大學,在此開展她的人生新一章。


  更多分類  
我的專業 (19)
校園生活 (41)
生活分享 (6)
旅遊日誌 (0)

校園內嘆社企咖啡
夢比樓更遠
思語 • 匯言
原來我成日與「藝術同行」
旺角都有飄色睇?

當科學家難嗎?
2011-03-25 14:54:44.0 網誌分類: 校園生活
 

人人都想成功,我@B都唔例外,難得大學請到鼎鼎大名嘅諾貝爾物理學獎得主楊振寧教授演講,講佢嘅學習經歷,我當然唔放過呢個學習機會啦,一早已經去WLB103霸位。好在我有先見之明,未到四時半嘅開場時間,已經全院滿座,楊教授嘅號召力果然厲害。

雖然我嘅物理知識只係有中三程度,但都聽得津津有味,皆因楊教授講嘅係好多做學問嘅應有態度,並唔局限科學,好值得各位大學生借鏡。楊教授提醒我地,當直覺與書本知識有衝突,其實就係學習嘅好時機,千萬要捉住呢個機會,分分鐘一啲驚世駭俗嘅發現就係咁誕生。

不過即使你對某一個題目有興趣,如果唔做足準備,想開花結果都好難。佢話喺芝加哥大學讀書嘅時候,大學每星期都有一個學術討論會同幾個研討會,學術氣氛好濃,對佢做研究好有幫助。芝大亦鼓勵佢地要注重新現象、新方法,少注重書本上嘅知識,啟發到佢唔少想法。

楊教授仲話,如果有好嘅想法,千祈唔好放棄,不過假如去到某個地步想極都想唔通,就唔好死碰爛撞,否則會發神經(全場大笑)!佢建議暫時放下,但就唔好放棄,幾年後話唔定會想得通。呢個對我真係當頭棒喝,我@B衰在好多時候唔夠堅持,成日遇到問題諗唔到,就以為無法解決,半途而廢,睇嚟我真係要好好向楊教授學習。

楊教授咁出名,除咗吸引唔少師生校友之外,現場觀眾入面竟然有兩個大概七至十歲嘅小朋友,其中一個喺QA session問楊教授,當科學家難嗎?真係直接得可愛!楊教授也答得中肯,佢話對某些人容易,對某些人好難。都係嗰句,睇天份啦!小朋友,最重要係學楊教授嘅學習態度,唔係學點做一個科學家,大家共勉啦!

回應(0)
讚好 (4)
Bookmark and Share

大師兄成功之道:態度
2011-03-16 14:35:39.0 網誌分類: 我的專業
 

早兩日有個五十五周年校友分享會,邀請到四位銀行界猛人兼校友同師弟師妹分享成功嘅心得。我雖然唔係讀Business,但都唔蝕底聽埋一份,話唔埋有朝一日會成為跨國銀行嘅首腦!

原來我有咁嘅諗法絕非妙想天開,因為在座嘅大師兄梁永祥同埋林志民博士都唔係讀Business,一個英文系畢業,一個就地理系畢業,同銀行業可謂風馬牛不相及。正如梁師兄講,畢業後大家都喺同一條跑道上跑,讀邊科唔重要,最緊要係態度,Attitude is 100% of what you do,仲舉咗好多例子說明態度有幾重要。

喺內地銀行業有豐富經驗嘅林志民博士則提醒我地,內地有好多機會,但係機會只係留俾有準備嘅人,例如提高兩文三語嘅能力、先喺香港累積工作經驗,增加對內地銀行業嘅認識等等。

工管畢業嘅尚達人師兄亦都強調要自我增值,佢將人比喻做股票,乜嘢股票都可以唔買,但一定要買自己隻股票,而因為呢隻股票唔會有人買,無得炒,所以要keep住增值。不過,佢話我哋新一代唔夠專注,時間都花在Facebook、MSN、online game。諗落都覺得有啲道理,或者真係應該聽佢講,開始讀番啲歷史、哲學嘅書,吸收前人嘅經驗。

不過我最欣賞嘅係公司管治與董事學碩士畢業嘅葉啟明師兄,佢喺銀行界有超過三十年經驗,而且從低做起,我最佩服佢不屈不撓嘅精神,遇到任何難題都會好積極咁諗辦法解決。我最記得佢話做人最重要係做到比人哋期望多一啲!嘩!要做得到都唔易啦,因為我哋可能連人哋嘅期望都唔知!

葉師兄仲教我地「一條線、一分鐘」嘅秘訣,線係死線,要突出自己,最好喺死線前一日交做好嘅工作;而一分鐘係指喺「交功課」俾上司前,先用一分鐘檢查有無低級錯誤,謹守呢兩點就萬無一失!

四位師兄縱橫銀行界幾十年,閱人無數,字字珠璣,真係獲益良多。聽講下次會邀請廣告同市場學嘅頂尖校友返嚟母校分享,我一定唔會錯過!

回應(0)
讚好 (4)
Bookmark and Share

五十五週年show-off!
2011-02-25 09:45:32.0 網誌分類: 我的專業
 

無錯!今年就係浸大五十五週年。據我所知,嚟緊會有一連串慶祝活動,參與嘅包括馳名國際嘅學者啦、我哋嘅校友同老師啦!得閒就上去五十五週年個網頁睇吓啦!

浸大五十五週年網頁

喂!咁同學呢?佢哋無份咩?

梗係唔會啦!同學都可以參加即將舉行嘅活動!不過,有啲同學就用咗一個好特別嘅方法,同浸大慶祝啦!你睇下以下呢條片: 

嗱,係咪好特別先,用小提琴嚟彈生日歌喎!

其實大學仲有好多人為五十五週年校慶送上祝福,佢哋特別拍咗十幾段唔同嘅片段,放咗上去浸大嘅youtube頻道。佢哋包括老師、同事、同學、交換生、同埋浸大嘅友好,大家都用唔同嘅方法向浸大講生日快樂!

浸大Youtube頻道

聽聞佢哋歡迎任何人拍恭賀片段向浸大講生日快樂,你又有無興趣拍番條片(可以send去cpro@hkbu.edu.hk)?不如你去睇睇呢十幾條片段先,話唔定你會受到啟發,諗到一個更特別更有創意更有氣氛嘅片段!

回應(0)
讚好 (4)
Bookmark and Share

World Peace, Love and Unity
2011-02-18 09:36:17.0 網誌分類: 我的專業
 

自從我加入浸大之後,發覺同我以前讀大學真係有好多嘢唔同,其中一樣最令我恨到流口水嘅,就係有好多海外實習同埋交流嘅機會啦!

好似每年一度嘅國際模擬聯合國大會,新一批嘅同學一共廿六人,即將晌三月兵分三路,去到美國波士頓哈佛大學、新加坡同埋北京,參加不同地區嘅模擬聯合國大會!

講番少少歷史啦!浸大今年已經係第八年資助同學參加呢個活動。同學會代表不同國家,同其他國家嘅同學討論世界性議題,包括環保、移民、氣候變化等等,真係好似晌聯合國咁!而同學出發前,大學會為佢哋提供訓練、包括地理文化、國際事務、談判或磋商技巧等,務求同學以最佳狀態迎戰!

佢哋啱啱舉行完誓師大會,我就走咗去八吓。原來佢哋今年會代表阿拉伯聯合酋長國,所以特別請咗佢哋嘅駐港總領事Mr Saeed Aljunaibi,同大家分享吓佢國家嘅資訊,等同學可以熱吓身做定準備。

今年活動嘅口號係Strive for World Peace, Love and Unity。諗諗吓又係喎,聯合國嘅目的咪就係通過協商,令每個國家嘅問題都得以解決,咁樣世界咪更加和平友愛囉!同學仲特別整咗一個好有意思嘅powerpoint,用感人嘅相片同埋獨白,表達佢哋對世界各種問題嘅關注,真係好有心思!

真係羨慕佢哋可以有機會出國見識!唔緊要,我會為佢哋打氣,當自己去咗啦!

回應(1)
讚好 (3)
Bookmark and Share

44蚊電費:你做唔做到?
2011-01-07 09:44:53.0 網誌分類: 我的專業
 

我講緊嘅係大學有機資源中心舉辦嘅「全港慳電減碳家庭比賽」,當中驘咗嘅家庭一家三口連菲傭總動員實行環保低碳生活,可以每個月只交44蚊電費。

44蚊?食快餐都食咗啦!有無可能呀?

不如一齊睇吓呢班驘家點做,又睇吓你做唔做到?

●小朋友著由朋友送嘅衫褲,亦唔用紙尿片,改用尿布
●超過三十度先開冷氣,平時用風扇
●手洗衣服
●返到屋企唔用電腦,因為晌辦公室己經處理好晒所有文件
●唔搭車,步行返工返學
●屋企全部改用慳電膽
●假日活動係去行山同游水,而唔係行街shopping

你話難唔難,話易又唔易啦。較為容易嘅,就係換慳電膽啦。好啦,手洗衣服,你得唔得?放入機洗方便好多喎。好啦,返屋企唔用電腦,點得呀,咁咪無嘢好做?咁行路返學呢?嘩,要預早成個鐘出門口,訓少咗無精神上堂喎。咁夏天唔開冷氣呀!梗係唔得啦,又濕又熱,點訓得著呀!星期六去行山,得喎,我上年去咗行一次山,只係兜咗城門水塘一個圈,第日已經腳痛啦!

你睇,任何嘢都可以好容易搵到藉口俾自己,環保亦係一樣。所以得獎者真係唔簡單,要晌一個物質咁豐富嘅社會過簡約生活,少啲定力都唔得。城市嘅進步帶來生活方便,問題只係我哋係咪願意放棄呢啲方便。人人都講求方便嘅今日,竟然有人反其道而行,真係不得不佩服佢哋!

我覺得大家唔係一定要做到佢哋咁先叫環保,而係希望大家知道,環保可以好容易,只係睇你有無耐性,有無定力去維持呢種生活方式,同埋點樣改變你對生活嘅態度。

回應(0)
讚好 (3)
Bookmark and Share


1 2 3 4 5 >



#

  Bookmark and Share  

快樂是一種意義
作者: 文潔華教授

2011-11-11 09:59:21.0

一群好友圍坐,你一言我一語地在埋怨生活。有說口袋的錢不足以到歐洲旅行,因為燃油附加費昂貴;有說膽固醇過高要減吃紅肉,簡直是人生一大懲罰;有說上司心理變態,經常要她更改工作計劃書到黃昏;股市慘情更帶來滿

通訊方法
作者: 馮強先生

2011-07-12 09:54:15.0

轉載 2011年2月7日[都市日報]P15 懷抱天下 (from wikimedia commons)在這個電子時代,電話已不再是最常用的通訊工具和方法。我最常用電郵,其次是短訊(text mess






使用條款網誌主頁浸大主頁聯絡我們 2009 香港浸會大學 版權所有 〡私隱聲明
本網頁以 Microsoft Internet Explorer 6.0 和 Netscape 7.0 或以上瀏覽器閱讀效果最佳