浸大師生登入 訪客登入
簡體 | 繁體 | ENG
 
@B
浸大職員

   
@B這個名字正好貼切地形容筆者與「浸會」的一段不解緣。

自幼@B的人生已巧妙地與「浸會」連繫上。小時在香港浸會醫院出世,十歲受浸於浸信會。其後,@B分別於浸信會呂明才中學和香港浸會大學完成中學及大學課程。自零五年大學畢業後,@B有感自己的足跡應遍佈「浸會」的每一個角落,因此她選擇回饋她的母校浸會大學,在此開展她的人生新一章。


  更多分類  
我的專業 (19)
校園生活 (41)
生活分享 (6)
旅遊日誌 (0)

校園內嘆社企咖啡
夢比樓更遠
思語 • 匯言
原來我成日與「藝術同行」
旺角都有飄色睇?

研究招聘廣告
2011-06-27 18:35:38.0 網誌分類: 我的專業
 

今日食飯果時行過電梯,俾我睇到呢個notice喎:


晌大學工作,周不時都會睇到呢啲通告,話某某學系做緊研究,要請同學幫手,可能係接受吓訪問呀,做吓test呀咁。當然就會有啲車馬費俾同學啦。

事實上,大學做咁多研究工作,不時都要同學幫手,主要係搵同學做被調查嘅對象,而呢啲車馬費亦都係一早晌做研究果時預咗筆錢。不過,呢一類嘅車馬費有時唔一定係錢,我就見過送usb指啦同埋超市禮券,有時都幾吸引!

不過咁,我覺得同學參加呢啲活動,唔單止為份獎品,而係俾機會睇吓人哋點樣做研究,到第時自己有機會做時咪可以做得好啲囉!睇吓人哋份問卷點set呀,啲問題點問呀,個研究做咩呀,全部都可能同你學緊嘅嘢有關,都係另一種學習途徑呀!

不過話時話,大學都放暑假啦,同學仔遊學嘅遊學、做暑期工就做工,究竟佢呢個時候請人會唔會請唔夠人做呀?

回應(1)
讚好 (2)
Bookmark and Share

地產≠霸權
2011-05-27 17:43:58.0 網誌分類: 我的專業
 


尋日大學又搞咗個校友分享會,返嚟分享嘅校友來頭不少,有長實嘅趙國雄、置業國際嘅蔡涯棉同紀惠集團嘅湯文亮博士,全部都係地產界猛人,喺地產行業打滾超過三十年,可以分享嘅經驗多到個半鐘頭都講唔哂,難怪座無虛席,兼有人要企足全場!

講開佢地嘅入行經歷,除咗湯博士因為受佢嫲嫲一句「有樓收租為人生兩大樂事之一」影響而一早打算做地產之外,原來趙國雄同蔡涯棉兩位師兄畢業之後都唔係做地產嘅。話說趙師兄最初喺恒隆旗下嘅德士古石油氣做Assistant Manager,但係做落覺得悶就諗住轉行,佢老闆問佢想做乜,佢諗起細個跟爸爸去鋪頭收租,於是就話做收租,就係咁開始沾手地產。

蔡師兄就話當年畢竟浸會學院唔係咁出名,搵工好難,佢攞住本商業電話簿睇,寄咗百幾封信出去,終於仲量行俾個機會佢見工。佢上到寫字樓,見到人地啲樓書好靚,而且全部係大銀碼嘅野,佢就諗地產呢一行應該有得做,就係咁入咗行,仲好俾心機咁做添。結果幾年之後,仲同朋友創業,亦即係今時今日嘅置業國際。

湯博士嗰故仔都好得意,佢家人想佢做銀行,但佢覺得做銀行好悶,於是做樓宇買賣,點知發現雖然賺到錢,但賣咗出去嘅樓原來會升值,於是唔賣,改為收租,應咗佢嫲嫲成日講嘅說話。

三位地產猛人聚埋一齊,當然都有講吓香港同內地嘅樓市發展,三人一致睇好,仲鼓勵有興趣嘅年輕人入行,不過由於香港市場都幾成熟,佢地都建議同學放眼中華,始終國內地大物博,仲有好多城市剛剛起步,發展空間好大,好多入去開發嘅香港同外國發展商都鍾意請返香港人,因為欣賞港人嘅處事態度、價值觀、責任感、誠信同獨立思考嘅能力,但係畢竟中港有別,佢地建議有意返內地發展嘅同學唔好嫌辛苦,起碼要喺內地住返一、兩年,清楚了解內地嘅文化同法制,咁就更加犀利喇!

回應(0)
讚好 (2)
Bookmark and Share

你apps咗未?
2011-04-13 16:23:00.0 網誌分類: 我的專業
 

依家搭車返工返屋企,個個攞住部手機係咁篤,數目已經超過咗睇書同埋打機啦,你話家陣啲「埃風」同埋「ann財」手機幾勁!我就唔捨得買,因為用開個台費都係三十幾蚊,突然要用個成三舊水既台,又未必用得晒d function,都係睇定d先!

不過唔駛你講,我都知家陣d apps好紅,真係人人都爭住霸番個靚位,無apps就唔夠潮!早幾日我見到有個apps係可以查到所在地最近嘅公廁,嘩幾鬼吸引,真係又搞嘢又實用,幾想即刻出番部「埃風」!

大學啲部門都追上潮流,近排上大學website,見到幾個部門都出咗apps。我無「埃風」,唯有叫有嘅同事download落嚟睇睇,叫做update吓個market sense。呢兩個月理學院、圖書館、新聞系同埋林思齊東西學術交流研究所都出咗apps,各有優點,又唔駛錢,睇嚟會越嚟越多人做apps,真正做到隨時隨地跟住你!

理學院慶祝創院五十週年,聽咗佢哋會出apps好耐,終於出咗,入面有三個games,加入綠色環保元素,似乎幾過癮喎!林思齊東西學術交流研究所個apps就比較傳統,但係有唔少有用資訊,例如佢哋d講座資料咁,幾有用!新聞系就出咗個ipad apps,可以睇晒佢哋啲刊物呀報紙呀咁,啱啲有興趣睇新聞故仔嘅人!圖書館個apps就係為咗嚟緊嘅第八屆全球華語大學生影視獎,你可以晌個apps度睇到參賽同學嘅作品,有成廿幾條咁多!嘩,如果可以睇埋圖書館其他嘢就好啦!不如諗諗佢呀!

唉!呢啲apps都唔重要,最重要係,我唔捨得出機,無得出機就無得玩!幾多apps都無用!唔得呀,要忍住,若果連坐車都要玩埋手機,咁我真係無晒私人時間啦!要緊貼潮流?要私人時間? 要緊貼潮流?要私人時間?.......


Green Choices(理學院) apps
http://itunes.apple.com/app/green-choices-by-hkbu-sci/id427917922#


HKBUtube apps
http://itunes.apple.com/us/app/hkbutube-on-the-go/id427735080?mt=8


林思齊東西學術交流研究所apps
http://itunes.apple.com/hk/app/hkbu-lewi/id424856222?mt=8


HKBU JOUR iPad apps
 
http://itunes.apple.com/us/app/hkbu-jour/id412804942?mt=8

回應(2)
讚好 (7)
Bookmark and Share

科學都可以好藝術
2011-04-07 12:04:53.0 網誌分類: 校園生活
 

恕我無知,我從來都以為科學係絕對理性嘅,而藝術就係右腦發達嘅感性產物,直至聽咗諾貝爾化學獎得主Dudley Herschbach教授講嘅talk,先至知原來科學係好藝術架。佢一開場就quote咗小說家Vladimir Nabokov嘅名句:There is no science without fancy and no art without fact,即係話無想像就無科學,無事實就無藝術。點解?佢舉例話好似宇宙嘅發現就係源於人嘅好奇心,其實而家每個星期都有幾個喺我地太陽系以外嘅星體被人發現,好多年前呢樣嘢甚至唔會有人提,而只係科幻小說嘅材料。

教授仲舉咗好多例子去講科學同藝術嘅關係,好似而家喺浸大教緊創意思維嘅張大健教授,佢讀化學出身,後來鑽研物理,同時係摺紙專家,摺咗幾十年,識摺好多嘢,十二生肖摺到真嘅一樣,連好鬼複雜嘅磁力球bucky ball都只係用咗九張紙摺出嚟,而更勁嘅係佢摺紙嘅方法係自己諗出嚟架,佢會喺個腦度將摺紙嘅過程形象化嘅諗一次,跟住就摺到!犀利!中間當然涉及計數嘅過程,但係Herschbach教授最欣賞嘅,係張教授識得將美學嘅精神同科學融會一齊。唉!如果個個科學家都可以咁藝術性咁表達佢地嘅研究,咁佢地嘅研究應該唔會咁難明!

Herschback教授講嘢風趣幽默,臨尾仲播咗首好好聽又好得意嘅歌,係Cole Porter嘅Experiment,講做科學實驗嘅樂趣,最啱送俾我做研究嘅朋友聽,佢地一定好有共鳴!

http://webphysics.davidson.edu/faculty/dmb/PittOpera/Experiment.htm

回應(0)
讚好 (2)
Bookmark and Share

科學令世界不和平?
2011-04-04 12:52:55.0 網誌分類: 校園生活
 


繼楊振寧教授後,大學再請到另一位諾貝爾獎得主Torsten Wiesel教授嚟大學講talk,佢係神經學科專家,對人腦嘅運作素有研究,不過佢今次講嘅唔係佢嘅研究,而係「科學作為和平的工具」,所以我@B都聽得明白,難怪個talk吸引到咁多人嚟,仲包括一班中學生添!

Wiesel教授經歷過二次大戰,相信對戰爭與和平有一定嘅感受。而家世界雖未至於大亂,但係中東同北非局勢動盪,大家齊齊讓子彈飛,幾乎要出動大殺傷力武器。呢邊日本嘅核電危機又未解決,令好多人突然反思,甚至質疑科技喺帶俾人類進步嘅同時,亦係世界不再和平嘅元兇!

不過Wiesel教授就唔係咁睇,佢話其實好多科學家都反戰,例如製造原子彈嘅科學家係反對原子彈使用同擴散嘅中堅份子。教授仲列舉咗好多攞過諾貝爾和平獎嘅科學家,例如一九六二年嘅Linus Pauling教授積極反核武測試,一九七五年嘅Andrei Sakharov雖然有份參與氫氣彈嘅製造,但好積極反對政府發展核武,證明科學家其實都好大力咁促進世界和平。

教授仲話科學家有共同語言,可以突破種族、文化同宗教嘅界限,反而有利緩和國與國之間嘅緊張關係,所以佢好推崇科學界嘅合作,又介紹好幾個匯聚世界各地科學家嘅組織,例如New York Academy of Sciences、Human Frontier Science Program,呢啲組織都有一個目標,就係等唔同國家嘅科學家走埋一齊,去為人類謀幸福。

正所謂「水能載舟,亦能覆舟」,科學其實就好似把雙刄刀咁,視乎你點樣用。我記得以前吳清輝校長都講過,科學家最緊要有「仁心」,所以浸大點解成日講全人教育,就係希望啲同學喺追求專業成就嘅同時,都要顧吓個世界,唔好盲目追求以至埋沒良心,諗落真係好有道理。

回應(0)
讚好 (1)
Bookmark and Share


1 2 3 4 5 >



#

  Bookmark and Share  

No Sweat
作者: 馮強先生

2011-05-17 10:25:08.0

轉載 2011年2月2日[都市日報]P12 懷抱天下 在這個互聯網世代,很多從來不利用科技的人也免不了要重新學習,因為不跟上時代只會吃虧。在澳洲,由西部的柏斯(Perth)到東部的悉尼(Sydney

內地有多少有錢人?
作者: 麥萃才博士

2011-01-25 09:23:10.0

轉載自2011年12月31日[am730] M32 MAK's COLUMN 早前由《福布斯》中文版與建設銀行(939)在北京舉辦「2010年中國財富管理論壇」,發表《2010年中國私人財富白皮書》






使用條款網誌主頁浸大主頁聯絡我們 2009 香港浸會大學 版權所有 〡私隱聲明
本網頁以 Microsoft Internet Explorer 6.0 和 Netscape 7.0 或以上瀏覽器閱讀效果最佳