浸大師生登入 訪客登入
簡體 | 繁體 | ENG
 
@B
浸大職員

   
@B這個名字正好貼切地形容筆者與「浸會」的一段不解緣。

自幼@B的人生已巧妙地與「浸會」連繫上。小時在香港浸會醫院出世,十歲受浸於浸信會。其後,@B分別於浸信會呂明才中學和香港浸會大學完成中學及大學課程。自零五年大學畢業後,@B有感自己的足跡應遍佈「浸會」的每一個角落,因此她選擇回饋她的母校浸會大學,在此開展她的人生新一章。


  更多分類  
我的專業 (19)
校園生活 (41)
生活分享 (6)
旅遊日誌 (0)

校園內嘆社企咖啡
夢比樓更遠
思語 • 匯言
原來我成日與「藝術同行」
旺角都有飄色睇?

詞人開show
2012-02-21 14:29:53.0 網誌分類: 我的專業
 


呢排上開facebook,我諗你一定會比朋友用Wyman演唱會片段嚟洗版。填詞人都可以開演唱會,你不能否認,大家都係俾流行曲歌詞養大!

不過,好嘢並不只係有林夕同Wyman,仲有周耀輝。周耀輝幫「達明一派」填詞出道,有好多好作品,亦都有唔少fans。佢依家晌浸大教書,晌上個學期就開咗個歌詞創作班,教同學寫歌詞。

歌詞班有三十位同學,經過十三個星期嘅課堂,終於交出咗佢哋第一份歌詞。佢哋亦同音樂人合作,將歌詞配上音樂,舉行《在世界末日之前……青春:周耀輝歌詞創作班(2011-2012)畢業作品演唱會》,同大家分享。演唱會日期係2月24日下午六時,晌浸會大學宿舍賽馬會廣場;2月25日下晝三點半,就晌中環威靈頓街56號Backstage。到時仲會有盧凱彤、馮穎琪、Loli及陳皓心等等唱作人晌現場一齊jam歌。

其實,寫歌詞都係表達自己嘅一個方法,而更多時候,我哋嘅生活都係好似俾歌詞tag住咗咁,即係好似喺facebook tag相咁。當你聽到某一句歌詞,就會立即想起某一個時刻或者片段,好似果段記憶俾人tag咗咁。我相信好多人聽流行曲,都係想用歌詞去tag住記憶,令你記住某個人、某件事。有興趣嘅話,可以睇吓同學點樣用佢哋嘅歌詞去tag住佢哋對青春嘅感覺啦!

若果你想嘅話,你都可以成為填詞人,可以開concert,唔駛去紅館,唔駛著靚衫!詳情可以去http://livebu.hkbu.edu.hk睇睇。

回應(0)
讚好 (4)
Bookmark and Share

全力支持55周年濃情大匯演
2011-10-14 10:09:27.0 網誌分類: 我的專業
 

2011年話咁快又過咗大半,咁即係話,浸大55歲生日嘅重頭戲又越嚟越近啦!若果你係浸大友好、校友、員工同學生,記住嚟睇十一月舉行嘅「香港浸會大學55周年校慶濃情大匯演」呀!

我查番記錄,浸大對上一次咁大規模嘅表演已經係5年前,即係五十周年果陣啦!五年之後,今次嘅規模更大,更多人一齊玩,你無理由唔支持吓啩!


其實今年大學都真係做咗好多嘢。好似三月果時創辦咗「創意研究院」啦,然後就請咗幾位諾貝爾得獎人嚟演講,仲有幾場由各個專業嘅校友主持嘅分享會,同埋國際級研討會。咁做咗咁多比較靜態同埋學術性比較高嘅活動之後,點都要有番啲熱鬧好玩又可以有好多人一齊玩嘅嘢先得,係咪?

首先,個show係免費嘅!若你係校友、員工同學生就有資格攞飛睇show。地點就係灣仔伊利沙伯體育館,日期就係十一月十三號,時間係下晝兩點半到五點半。

有咩睇?梗係浸大人傾情演出啦!有演藝界校友做話劇啦、有國際級魔術師甄澤權表演啦、有人氣創作歌手王梓軒同埋浸大同學一齊表演啦、有新聞系校友主播唱歌啦、有乒乓好手李靜同陳新滋校長切磋球技啦……嘩,未完呀,仲有浸大同學仔BUDA、SENZA、劇社、音樂系敲擊樂小組、中小學幼稚園同學仔,同埋黃志淙帶領大家大合唱,好多節目,數到氣咳!

成個大匯演由資深傳媒人麥潤壽擔任製作總監,有聽開佢節目都知佢成日搞年青人活動,今次大匯演晌佢掌舵之下肯定動感十足。加埋咁多名人校友一齊玩,除咗星光熠熠之外,亦係浸大一次晒冷之作!

晒咩冷?聽個名就知,「濃情大匯演」喎,梗係要話俾人知,浸大人畢業之後,各有成就,但係都唔會忘記母校,趁55周年校慶大家都要出一分力!呢啲咪叫做「濃情」囉!

浸大人,快啲行動,依家開始可以網上攞飛啦,快啲去下面個網址睇睇,截止日期係十月廿一日!
http://www3.hkbu.edu.hk/~annigala/index-chin.php

想知多啲大匯演節目資料,可以去下面條link:
http://www.hkbu.edu.hk/~cpro/download/55gala.pdf

回應(0)
讚好 (21)
Bookmark and Share

10月15及16日浸大入學資訊日
2011-10-10 11:55:31.0 網誌分類: 我的專業
 


無論你係中六定中七嘅同學,你都一定要嚟浸大入學資訊日!

大家都知今年非常特別,因為不論三年制定係四年制都係一齊申請入大學。所以浸大今年嘅入學資訊日就分開兩日:十月十五日係俾三年制同學,而十月十六日就俾四年制。記住記住!

今年除咗有各個學院學系嘅資訊之外,每日仲有講座針對唔同需要,包括由浸大教務長主講三年制及四年制入學課程講座,俾同學了解浸大嘅入學資訊。而針對三三四學制,我哋亦同輔導教師協會合辦兩個講座,歡迎老師同埋家長同學一齊嚟聽。

仲有新嘢玩,除咗有website俾你搵資訊外,仲有入學資訊日嘅apps,等你方便搵資料。你知啦,分兩日喎,又咁多節目,所以個apps做到可以俾你編排時間表。你搵到個講座想去嘅,就add佢落你個行程表度,又有埋電話同埋地圖,跟住個schedule就可以去晒你想去嘅talk,超方便!

今日聽啲同事講,兩日InfoDay會有唔少入學同埋面試貼士,若果你想嚟浸大讀書就唔好錯過!當日仲有印刷精美嘅postcard任你攞,上面印埋聯招嘅重要日期,攞番張提醒自己都好!


今年我哋仲玩埋上面個QR code,快啲搵部手機試下!

HKBU InfoDay Website: http://www.hkbu.edu.hk/ar/infoday2011
HKBU InfoDay App: http://itunes.apple.com/hk/app/hkbu-infoday/id464090399?mt=8

回應(0)
讚好 (1)
Bookmark and Share

我都想做化驗師…
2011-09-30 10:13:07.0 網誌分類: 校園生活
 

前幾日同理學院同事Fanny(化名)吃飯,傾開2012年新學制,佢臉上即刻流露一個羨慕嘅眼神,仲話如果遲十年出世就好。點解?原來新學制嘅課程設計好有彈性,俾學生多啲選擇,設計一個啱自己的學習計劃。

淨係改為以學院形式聯合收生就夠好啦,學生第一年可以樣樣學啲,生物、化學、計算機科學、數理化、物理都有得學,學咗基礎之後至決定選修邊一科,唔駛後悔揀錯科入錯系。最正係課程不設限額,只要你想選修嘅學科成績達到C級或以上,就有機會讀到心儀嘅課程。

聽Fanny講,頭一年仲有科新嘅綜合科學實驗室學科,環繞綠色能源、環境科學、鑑證科學同埋科學與娛樂呢四個主題,等同學親身體驗唔同科學範疇嘅實際應用,聽落好鬼吸引。Fanny話呢一科屬於跨學科性質,希望訓練同學用唔同嘅科學角度去研究同解決問題,等同學建立批判性嘅思維兼提高解難能力。


Fanny仲介紹咗化學系一個新課程,叫「分析和檢測科學理學士(榮譽)」,可以為香港提供化驗嘅人才。唔講唔知原來香港有超過200間化驗所,對化驗嘅人才需求好大。讀完呢個課程出路都好闊,可以去政府化驗所做化驗師,又可以去食品或者中、西藥廠做品質監控化驗員,甚至乎做分析測試儀器嘅銷售同維修工作,都係一門專業。

新學制咁吸引,呢一代嘅同學仔真係幸福。莫講話Fanny,連我唔係理科畢業嘅聽完之後都勁羨慕!

回應(0)
讚好 (4)
Bookmark and Share

不健康搏殺期
2011-07-14 10:51:52.0 網誌分類: 我的專業
 


我有個朋友做傳銷,專賣健康食品。講真我都預咗佢會成日sell我啦,見到面就問我身體點樣,有無興趣試吓佢啲產品。唉,佢都真係唔識得做吓市場調查。作為佢嘅潛在客人,無理由佢唔知我一直有非常健康嘅生活習慣,少油少糖少鹽,又定期做運動,又駛乜食埋啲不知名嘅嘢落肚呢?

不過咁,就算你晌讀書時嘅生活幾有規律都好啦,一出嚟做嘢就一定諗住搏殺,一星期做足七日都好平常。通常都係恃住自己後生以為訓少啲、亂咁食嘢都無所謂,最終搞到自己超重呀、成日眼訓呀、又易感冒傷風,然後啪幾粒藥以為可以醫好個病,再繼續做嘢同理玩。

尋日大學公布咗一個「香港人群生活方式現狀調查」,正好講出咗大部份香港人都有唔好嘅生活習慣。個調查訪問咗三千人,有超過半成人話無食早餐習慣,仲有超過一成人每日訓唔夠六個鐘頭。嘩乜原來香港人真係咁睡眠不足呀?真係咁多嘢做?又係喎,我都有朋友成日要帶paper返屋企做,做event又要做到半夜然後第二朝九點正又晌公司出現啦。

其實呢個現象,同調查結果不謀而合,因為調查發現25至39歲的人生活最唔健康,包括無定時食早餐,睡眠不足,又無運動。因為呢個年齡嘅人正值事業搏殺期,忙碌工作導致生活不規律。咁可以點呢?我都唔知,打工仔好多時都無得選擇,唯有自己安排好啲時間,例如早啲起身做運動同食早餐,放假就唔好「喪玩」仲忙過返工,訓番夠本同埋做吓運動咁。

講番我個傳銷朋友,佢又係典型搏殺份子,由朝做到晚都係四圍去sell嘢,一有唔妥就乜藥都食。咁樣落去亦唔係辦法,調查都發現香港人好多係靠食藥而唔係運動健身去保持健康。咪係囉,只係靠食健康食品係唔work嘅,我都成日叫佢忙少啲,搵啲時間做吓運動,咁個人都精神啲去見客呀。唉,香港人做事有效率係好事,但係若果無健康身體,又點去拼搏呢?

調查報告詳情請按此

回應(0)
讚好 (2)
Bookmark and Share


1 2 3 4 5 >



#

  Bookmark and Share  

新派宣傳法──「偷拍」
作者: @B

2009-08-19 17:42:27.0

噚日@B喺報紙睇到段新聞,話You Tube最近出現咗一條熱播短片,叫做「港女m記怒罵愛滋男友」,段片上載短短一日,就吸引咗超過八萬人次瀏覽,仲引起唔少網友大肆評論添! @B於是發揮「至八」精神睇

風球
作者: 文潔華教授

2011-02-14 09:39:59.0

別要慨嘆尊卑之分,長幼有序的時代已成過去,因為歷史巨輪,大氣候與小氣候,都難以阻擋。 研究生到內地交流,回來憶述他所聽所聞的導師與學生關係,「猶有餘悸」。他說內地大學的指導老師甚具權威,常常吩咐研究






使用條款網誌主頁浸大主頁聯絡我們 2009 香港浸會大學 版權所有 〡私隱聲明
本網頁以 Microsoft Internet Explorer 6.0 和 Netscape 7.0 或以上瀏覽器閱讀效果最佳