浸大師生登入 訪客登入
簡體 | 繁體 | ENG
 
@B
浸大職員

   
@B這個名字正好貼切地形容筆者與「浸會」的一段不解緣。

自幼@B的人生已巧妙地與「浸會」連繫上。小時在香港浸會醫院出世,十歲受浸於浸信會。其後,@B分別於浸信會呂明才中學和香港浸會大學完成中學及大學課程。自零五年大學畢業後,@B有感自己的足跡應遍佈「浸會」的每一個角落,因此她選擇回饋她的母校浸會大學,在此開展她的人生新一章。


  更多分類  
我的專業 (19)
校園生活 (41)
生活分享 (6)
旅遊日誌 (0)

校園內嘆社企咖啡
夢比樓更遠
思語 • 匯言
原來我成日與「藝術同行」
旺角都有飄色睇?

校園內嘆社企咖啡
2013-03-19 17:30:31.0 網誌分類: 校園生活
 



喺善衡校園邵逸夫大樓五樓嘅「善衡熱點」一向都係同學忙裡偷閒嘅好去處,成日都見到同學喺嗰度傾偈、上網或者睇書,坐喺近窗嘅座位度得閒望吓出面嘅街景,又確係幾悠閒寫意,手機ipad唔夠電仲可以借線充電添,我@B都不知幾羨慕! 

最近連人都可以喺度充電!點解?因為「善衡熱點」開咗間「甜在心」咖啡室(Sweet Heart Cafe),係香港中華基督教青年會同浸大合作嘅社企項目。咪睇佢細細檔好似好簡陋咁,飲品同小食甜品嘅款式都唔少,有咖啡、茶、新鮮果汁、三文治、熱狗、鬆餅、厚多士、迷你薄餅、曲奇等等,連「心太軟」都有!想健康啲可以飲花茶,仲有新鮮水果供應,同學上堂上到攰,或者同事想唞下飲杯咖啡,呢度都係唔錯嘅選擇。我就試飲咗杯latte,水準不下於連鎖咖啡店,價錢仲平啲添! 

Sweet Heart Cafe上星期五3月15號至正式開張,我同負責人傾過,開張以嚟生意都唔錯,為咗慶祝開業,而家至3月28日期間,每日第50位、100位、150位(如此類推)顧客買任何小食或飲品,都可獲贈12安士熱飲一杯!佢仲話日後不時都會有啲優惠推出,叫大家留意住網頁(http://sa.hkbu.edu.hk/home/campus-life-support/welfare-and-services/student-hotspot/sweet-heart-cafe/#toc-5)。

回應(0)
讚好 (1)
Bookmark and Share

夢比樓更遠
2012-11-14 16:22:45.0 網誌分類: 我的專業
 



曾幾何時,我同好多香港年輕人一樣,覺得大學畢業好幾年,係時候離家獨立,買番間三、四百呎屋仔,諗住有自己個竇,真係做宅女都方便d。但最後,呢個諗法都無付諸實行。一方面係樓市爆升完一浪又一浪,已經超出我個人認為合理既價碼,另一方面,我一諗到買左樓之後,同靚衫靚鞋絕緣都係其次,你知啦,我d咁藝術家性格既人,隨時都有衝動要去浪跡天涯架嘛(呢句唔好比我老闆睇到),但若然背負住銀行樓按呢個終身債務,睇怕從此被困。

估唔到我嘅諗法得到「樓神」endorse!尋日(11月13日)我去左大學嘅「2012年榮譽社會科學博士學位領受人」趙國雄先生公開講座。趙生其實係浸大校友,1971年入讀社會學系,但後來因為佢發起反貪污運動,俾警察拉左去。由於當時嘅浸會學院正在申請政府資助,佢為免影響學校,於是決定一人做事一人當,毅然退學,跟住去左加拿大繼續學業。後來佢係事業上有幾成功都無需多講,但最難得係佢雖然無喺浸大正式畢業,但咁多年黎一直出錢又出力咁支持大學,真係好有情有義。

講番場講座,因為係以「有樓得天下﹖」為題,我估在座大部份人都以為「樓神」梗係又講樓市走勢,但原來佢係想透過呢個題目,同大家分享自己嘅人生觀,同埋探討吓香港嘅價值觀。趙生話佢感受最深嘅,係好多香港人心目中認為「有錢就成功、有樓便出眾」。佢感慨,咁嘅價值觀實在太短視、單元。所以,佢特別喜歡浸大全人教育嘅理念,因為呢個理念鼓勵同學發展多方面嘅潛能,可以喺各行各業作出貢獻,唔一定要投身金融地產、賺好多錢先至為之成功。

而佢今次「說到我心坎裡」嘅話,係奉勸大家如果未準備好,千期唔好急住買樓!趙生話,佢見過好多人買完樓孭上債務之後,生活就剩番喺間屋同office來回奔波呢「兩點一線」。佢認為生活緊絀都算,但最大問題係你會捨棄人生好多可能性。事緣當你要供樓,你就需要份穩定嘅工,唔夠膽轉工,又唔夠膽作出新嘗試;唔敢暫時停工去進修,或者休息一段時間重新上路……。總括而言,唔敢再去「追夢」。

聽到呢到,我內心拍晒手掌。平日我同朋友講類似嘅嘢,往往俾人話我份人不切實際。今次聽「樓神」一席話,終於知道「吾道不孤」。

 

回應(0)
讚好 (6)
Bookmark and Share

思語 • 匯言
2012-10-19 17:22:07.0 網誌分類: 我的專業
 

呢兩個名係唔係好詩恴呢?佢地唔係我朋友嘅名,而係位於新教學及行政大樓四樓嘅Learning Commons新名,英文名都好有意思,叫My ZoneOur Zone。呢啲名係同學諗出嚟,之前搞咗個命名比賽,收到85對名,好多都好有創意同心思,真係難分高下,評審幾經辛苦先至揀到冠軍同優異獎。順帶一提,優異獎得主之一係學生會主席黃學禮同學,佢仲好大方咁話將件獎品捐出俾千人宴抽獎用!

 

呢個新嘅Learning Commons今日舉行開幕禮兼Open Day,我當然第一時間飛身入去參觀。首先入去「匯言」(Our Zone)睇,一入到去……嘩!地方好寬敞,分成多個互動學習小區,仲有我嘅摯愛梳化,最啱同學仔group discussion,而且出面有個大平台,傾到攰可以出去吸收陽光,呼吸一下新鮮空氣添。

 

去到隔離嘅「思語」(My Zone),學生大使就提醒我唔好咁大聲講嘢,因為呢個區主要俾同學做功課,所以唔好打擾佢地嘅思緒,就算有幾個同學喺度傾嘢,大家都好尊重其他同學,唔會大聲講嘢。呢度仲有個賣點,就係有Printing Room,方便同學做完功課印埋出嚟。

 

Learning Commons仲有好多房俾同學book,啱哂一班人要傾project用,不過當然係先到先得啦!

 

所謂無圖無真相,想知「思語」同「匯言」有幾靚,睇吓就知啦!

 

 

 

 

 

回應(0)
讚好 (1)
Bookmark and Share

原來我成日與「藝術同行」
2012-07-17 14:14:02.0 網誌分類: 我的專業
 


好開心,真係好開心。有時我見到路邊一朵花,或者一堆落葉,又甚至落完雨後地上面嘅一攤水,都可以停低,望住佢地發一陣呆。唔理解嘅人,會覺得我好無聊兼傻傻地。但呢日去完一個叫「藝術與藝術教育」嘅座談會,聽完其中一位嘉賓小思(盧瑋鑾教授)嘅說話,我當堂明白,原來我呢個係欣賞藝術嘅行為!

小思話,只要大家每日抽五分鐘出黎,見到草地又好、樹又好,就望住佢地五分鐘,乜都唔使諗,咁就已經係欣賞藝術嘅一種方法。佢提到呢樣嘢係因為,在座講者都認為香港步伐太快,快到根本無辦法孕育好嘅藝術人才同埋創作;而觀眾席上亦有一位浸大同學,講到喺咁匆忙嘅時代步伐下,佢地年輕人即使有心,但硬係唔可以靜落黎欣賞下藝術。於是幾位嘉賓各抒己見,其中小思建議大家試下呢個日本明治維新時期,一個散文家提出「每日五分鐘,細緻品嘗你所睇到嘅自然物」嘅方法,佢話自己都成日咁做。

好耐無聽過一個咁精彩嘅座談會。其實佢緊接住「藝術同行」計劃啟動禮舉行,講者堪稱星級人馬,小思唔使多講,重有我好喜歡嘅泰迪羅賓,同埋中大建築學院林雲峰教授,加埋教育局李樂華博士、浸大林文傑教授同盧偉力博士三位主持人,接近兩個鐘嘅講座毫無冷場兼火花四濺,包括我在內嘅觀眾都聽得好投入吓。

講返「藝術同行」計劃係乜先。呢個計劃由浸大創意研究院、教育局同香港藝術發展局合辦,根據介紹,目的係希望提升中學生同大學生係藝術欣賞、推廣方面嘅知識同技巧,又希望佢地透過參與藝術活動,培養出服務他人嘅精神。呢日坐滿大半場嘅後生仔女,就係廿幾個浸大學生「指導師」,同埋九十位中學「校園藝術大使」。喺黎緊一年,指導師會分組帶校園藝術大使參加活動同埋參觀藝術展覽。到最後,佢地更加會一齊做個結業展覽,展出個人作品。

唉!如果我細個有啲咁嘅計劃就好啦,以我咁嘅藝術天份,有人指導下,一個唔覺意可能大有作為嘛。不過算啦,正如泰迪羅賓話齋,唔一定要識藝術,甚至乎可能唔知嗰樣嘢係咪藝術,總之鍾意、好玩就得,即使純粹係一個欣賞者,覺得開心都已經對身心有好大幫助。好啦,我會繼續「藝術」架啦!

 

回應(0)
讚好 (3)
Bookmark and Share

旺角都有飄色睇?
2012-04-26 17:37:18.0 網誌分類: 我的專業
 

今個星期六28號係長洲嘅太平清醮,不過想睇飄色唔一定要山長水遠入長洲同人迫嘅,旺角嘅行人專用區都有得睇。何解?因為AVA 視覺藝術院13個修讀「香港傳統工藝與傳承」嘅學生,跟長洲一位八十幾歲嘅老師傅學做飄色工藝嘅秘技,例如飄色嘅飄梗、過橋等基本骨架焊接,佢地仲包辦道具製作,主題構思同埋人物造型,仲會加啲九十後嘅文化特色添。今個星期六下晝4:306:00,佢地就會喺旺角行人專用區出巡,將飄色帶出長洲,俾大家睇吓佢地嘅學習成果。至於主題喎,當然離唔開最熱門嘅時事題材,聽講話會有青年就業、住宿同埋「雙非」問題,充分反映呢種傳統藝術同日常生活接軌嘅特色,唔知佢地會唔會同場加演通脹、網絡23條呢?

 

查實喺呢個連拜山都可以上網嘅網絡科技年代,好多好有特色嘅傳統手工藝已經漸漸失傳,例如紙紮、刺繡。雖然不合時宜嘅野被淘汰係好合理,但係完全消失哂又好似有啲可惜,始終呢啲傳統手工藝點都有啲藝術價值,所以我都覺得應該保留同承傳。難得呢班學生仔有心學,老師傅又肯教,點都要支持下,一於今個星期六旺角見!

 

 

 

回應(0)
讚好 (4)
Bookmark and Share


1 2 3 4 5 >



#

  Bookmark and Share  

我的印度印象(一)
作者: 趙中振教授

2011-01-12 11:53:35.0

     我剛剛去印度參加了一個學術會議,連去帶回六天行程。我所見到的印度,好的地方比想像得要好,差的地方比想像得要差。簡言觀感,兩個字——震撼。 奇景美如畫     新建的新德里機場有三個候機大廳

聯福樓結業:以教育經費幫助資方?
作者: 葉敬德牧師

2011-07-18 11:24:55.0

聯福樓結業:以教育經費幫助資方?或籌款資助勞方? 在香港浸會大學內經營近15年的聯福樓海鮮酒家舊承辦商因不獲續約而結業,員工聲稱被拖欠遣散費、代通知金、年假及強積金供款等而釀成勞資糾紛,我和大家一樣






使用條款網誌主頁浸大主頁聯絡我們 2009 香港浸會大學 版權所有 〡私隱聲明
本網頁以 Microsoft Internet Explorer 6.0 和 Netscape 7.0 或以上瀏覽器閱讀效果最佳